之前老公生日嚟個短期旅行慶祝下都唔錯！
第一次帶小朋友去中國，酒店環境好舒服～好似去咗泰國咁！附近有景點又多嘢玩，一直覺得返大陸好危險，但今次一切感覺良好！冇我想像中咁恐怖架～（只限今次旅行體驗啊）
第一日行程：深圳觀瀾湖度假區>四季日本餐廳>觀瀾湖新城MH Mall>酷跑卡丁車>冰堡國際>Aeon kidzoona 莫莉幻想親子園>海底撈火鍋
由於我哋要去皇崗口岸乘搭酒店免費巴士，所以到太子搭過境巴士過關！就係金都隔離條馬路㗎咋！近鴉蘭街，都幾方便！
巴士詳情請睇：
http://www.681busterminal.com/hg-mk.html
到前邊鋪頭仔買飛就可以上車啦！用八達通付款大人$41，三歲以上小朋友$20！
到關口落車過關，冇咩人完全唔使排隊，好快過咗關！
過關後上返剛才的旅遊巴，過埋條橋就到皇崗口岸啦！
落身過關，大約1小時車程就到達皇崗口岸，出閘後轉左直行就見到17號舖，喺度等酒店免費巴士
座位有限，記得免費巴士要預先登記預約㗎！
係呢個時候，換埋張大陸電話卡，咁就隨時隨地都上到網啦！呢張卡效果滿意，一路都好順暢，香港網站、Facebook 、WhatsApp都上到！係深水埗買$40一張！
等左一陣酒店巴士就到啦！
沿途冇塞車，大概45分鐘到達酒店！
如果唔搭旅遊巴，搭的士應該要百幾蚊！
小朋友坐車坐太累啦！即刻上房休息一陣先～
嘩！房間很大！很舒適～沒有異味很乾淨！
開放式洗手間、沐浴間設計！
有浴缸！可以浸浴～浴室空間感好大！
仲有個露台，天氣好好啊！空氣清新～環境好靚，望出去就係哥爾夫球場！
再參觀下房間，雖然呢間係洒店最普通房，但係都好大好舒適！好適合小朋友住，原本酒店有四間兒童親子房，不過已經full左，想訂嘅要早啲啦！
設備齊全，基本上要用的都有！
有我最需要嘅風筒！
小朋友瞓醒出發去午餐先！
酒店內仲有一個小花園！好有泰國風味～
我們入住嘅係3樓房間
睇到4樓有兩間親子房啊！
周圍行吓，見到有錦鯉池！
呢度都有得做Spa 㗎！
最特別嘅係有親子Spa套餐！
大人同小朋友都可以一齊享受！
不過我哋今次冇做啊！下次有時間一定要試吓～
午餐我哋食呢間Shiki 四季日本料理餐廳
有BB櫈提供！
環境好靚！望住泳池景，藍天白雲～心情超好！
仲有兒童餐具提供添～
好肚餓呀！叫到成枱都係！哈哈～
食物水準都唔差，真係唔覺自己返咗大陸！
最後食埋個雪糕甜品！好正啊！
超有渡假feel～
大家可以參考下餐牌，酒店來講價錢正常唔會太貴啦！
我哋嘅酒店套票係包括左$500餐飲券，係呢間餐廳都可以使用㗎！
食飽飽準備出發去觀瀾湖新城MH Mall玩！
喺酒店門口乘搭A線免費接駁巴士就可以到達！
之後去嘅手藝工場、生態體育園（機動遊戲）、巴迪奧餐吧都係搭呢架接駁巴士就去到！超方便㗎！
大約10至15分鐘一班，B線就係回程返酒店搭嘅，而H同M線係假日人流多加開嘅班次！
酒店大堂有遊樂指南俾大家參考～
酒店內都有好多玩樂設施同餐廳可以選擇！
大約5分鐘車程就到達觀瀾湖新城，呢度係玩樂購物商場！地方很大～可以逛成日嘅地方！最特別可以攜帶寵物進入商場！
地下個層就有間超大嘅超級市場！應有盡有！
我哋第一站先來玩卡丁車！雙人車$100/ 8分鐘，單人車$80/8分鐘，不過我哋唔使俾錢㗎！因為酒店套票有包埋㗎！係咪好抵呢！哈哈～
個場都幾大㗎！扮吓嘢影張相先～
因為小朋友未夠高要同媽咪一齊玩啦！
因為我比較安全駕駛，所以揸得好慢⋯哈哈！
不過都幾好玩㗎！體驗下唔錯～
嘩！超級巨型扭蛋機！
商場裏邊仲有好多夾公仔機玩！
仲有好多按摩機⋯
哈哈，俾啲媽媽按摩，爸爸就帶小朋友去玩！yeah
跟住走咗去溜冰，個場勁大！
太耐冇玩過，體驗下都唔錯！
平日玩嘅話，一場六個鐘左右，6-70蚊人仔，假日就玩兩至三個鐘！不過我哋都係唔使俾錢，酒店套票包埋㗎！
我仔隻腳14至15 cm，竟然有咁細嘅鞋啱佢着！
第一次體驗！好滑好滑！哈哈
太耐冇玩過生疏哂啦！玩左一陣腳就勁累～
溜冰場隔離就係呢間遊樂場⋯走唔甩啦！
Aeon kidzoona莫莉幻想親子園，呢個係自費架，入嚟睇吓有咩玩：https://wp.me/p9JmWE-22d
商場有5層！玩樂地方很多，基本上一日玩唔晒！
玩左兩三個鐘遊樂場，繼續喺3樓行下⋯
發現左間機舖星際傳奇，好搞笑！入邊間雙人唱K房，有得唱卡拉OK～
再行前少少見到MollyFantasy莫莉幻想，兒童機鋪
不過我哋嘅目標唔係呢度，所以俾佢坐下影相就走啦！
繼續向前行行出商場天橋，就見到地下原來有機動遊戲⋯呀仔見到又話要玩！
原來觀瀾湖新城好大！我哋只係行左一層已經一個下午⋯
因為我哋唔想玩機動遊戲，為咗滿足呀仔就玩呢個電動車啦！
哈哈！幾得意喎！原來可以家長陪埋一齊玩～咁就唔怕佢撞到人啦！呢個幾好玩！因為商場地方夠大，所以揸得好舒服～呀仔有得揸車好開心！
我哋玩呢架$20 /8分鐘，仲有其他車仔㗎！
跟住前邊就見到呢間蹦床公園！係一個超級大嘅跳彈床嘅地方，仲有彩虹繩網區～平日真係冇咩人㗎！如果平日來玩比較舒服啲！
因為價錢都唔平呀！188人仔一個人，而且當時已經五至六點，唔夠時間玩，所以我哋唔玩呢個！不過好戲在後頭⋯
繼續向前行入商場，見到有喜茶！
咁出名一定要試吓啦！
大約20幾蚊杯，見到期間限定有桃味同荔枝味！張相非常吸引呀！就試呢兩隻味啦！
嘩！好靚呀！桃粉紅色～即刻少女心爆發！
桃味奶蓋都好好飲，入面有果肉！
我好鍾意食荔枝㗎，超香真荔枝味！入邊仲有荔枝肉，感覺清爽！上面嘅奶蓋仲好香滑～非常回味！
好戲在後頭就係呢度啦！頭先喺3樓望落嚟已經見到⋯係咁話要來呢度玩！哈哈～呢個時候爸爸就去嘆喜茶，我就陪個仔放電啦！
超級大嘅波波池⋯仲有三層高嘅迷宮！
滑梯太高了，大家都唔敢sir…哈哈
唔知有幾多十萬粒波波，勁誇張！
橙紅色好靚，好有夏天感覺～
仲有機關、香蕉船、倉鼠跑步圈⋯好好玩！
係度玩左一至兩個鐘⋯呢個時候已經七點幾啦！
風車小鎮：每場一大一細$50人仔！
玩到天黑喇！原來條橋着左燈好靚喎～
我哋晚餐上去食服務好出名嘅海底撈火鍋！
因為要等幾張枱，服務員非常殷勤，先帶我地入嚟等候室等位，入面竟然有BB床⋯
喺等候室已經不斷攞野比你食！非常周到，有小食、有前菜、有嘢飲、仲有糖水⋯免費任食嘅！
我有冇睇錯！除咗係等候室免費招待外，仲可以免費享受：美甲手部護理、擦鞋、量血壓、清洗眼鏡、印相⋯入去食餐飯就有咁多免費嘢！
美甲好受歡迎！
好快就等到位！
有BB櫈同兒童餐具提供！仲有免費提供俾小朋友嘅蒸蛋！
真係好貼心！驚我件衫整污糟，幫我戴上手套！
叫咗個麵，有師傅即場係你前邊拉麵～呢個幾特別！個麵都好好食，好彈牙！
食到好飽！好滿意，由等待室嘅食物，之後前菜、主菜、最後仲有生果同葵花子！包你食唔停口！
最後最開心嘅一定係小朋友！竟然有免費玩具送！
大家都好驚喜～大大架工程車食飽有得玩！
最後埋單店員仲話，因為頭先等枱要我地等左好耐，所以俾個88折我哋！仲送咗個相架俾我哋，出去免費印兩張相⋯嘩！由一入去餐廳個刻開始，就受到殷勤款待，喺香港從未試過咁嘅服務⋯大家一定要黎試吓！超級滿意！
最後行返去頭先落車位置，搭B線返去就得啦！
返到去洒店10點，玩左成日勁攰啊！
睇吓我哋第二日行程去咗邊：洒店早餐>游水>觀瀾湖藝工場>Patio café>觀瀾湖生態體育園
———————————————
觀瀾湖官網：
https://www.missionhillschina.com/
官網直接訂深圳觀瀾湖洒店套票：
———————————————
Follow 埋 IG:https://www.instagram.com/chochomamami/
60款＋幼兒菜式分享(不定時更新)
https://www.facebook.com/chochomamami/posts/1156137214530144
80個＋親子好去處(不定時更新)
https://www.facebook.com/chochomamami/posts/1189315614545637
#深圳觀瀾湖 #觀瀾湖 #深圳美食 #四季日本餐廳 #綠茵閣 #Patio café #巴迪奧冰室 #觀瀾湖新城 #MH Mall #酷跑卡丁車 #冰堡國際 #觀瀾湖藝工場 #MH Maker #觀瀾湖生態體育園